Төрээн дылывыстың хүнү-биле! Эргим чаңгыс чер-чурттугларывыс! Тыва дылдың эдилекчилери! Өөредилге яамызының болгаш өөредилге шугумунуң бүгү башкыларының өмүнээзинден төрээн Тыва дылывыстың хүнү-биле изиг байырны чедирип тур бис! Тыва дыл хүнүн бо чылын он дугаар демдеглеп, аңаа тураскааткан «Тыва дыл – чоннуң өнчүзү» деп X шуулганны бөгүн Улусчу чогаадылга бажыңынга байырлап эрттирген. Шуулганга Өөредилге сайыды Орлан Соян байыр чедиргеш: «Тыва дыл – тыва чоннуң бот-тускайлаңын илередип чоруур өзек көргүзүглерниң бирээзи. Ада-өгбеден дамчып келген төрээн дылывыска хумагалыг болбушаан, ону амгы үениң сайзыралынга дүүштүр тыва дылче чаа билиишкиннерни, сөстерни, очулгаларны киирери, амгы үениң шакпын агымы негеп келген. Оларны бистиң ажы-төлүвүс база шиңгээдир ужурлуг. Өзүп орар аныяк салгалга төрээн дылын дамчыдарынга Тываның өөредилге шугумунда чүс-чүс башкылар, кижизидикчилер үлүг-хуузун киирип, билиг-мергежилин харам чокка өргүп чоруур. Тыва дыл болгаш чогаал башкыларын тыва дылдың келир үезиниң кол магадылалы болгаш келир үениң тыва дылдыг хамаатыларының шуткукчулары деп бүзүрелдиг адап болур бис. Байлак сөстүг тыва дылывысты янзы-бүрү өөредилге-методиктиг аргалар-биле чаштарывыска, сургуулдарывыска дамчыдып, өөредип, ону суртаалдап, нептередип чоруур хүндүлүг башкыларывыска чоргаарланмышаан, өөрүп-четтиргенивисти бо онзагай хүнде база катап илередирин чөпшээреп көрүңер!» – деп демдеглээн. Шуулганның шиитпириниң төлевилилениң Өөредилге яамызының Национал школа хөгжүдер институттуң сайтызында салган. Шиитпирниң кол саналдарының бирээзи – Тываныӊ Баштыӊы Владислав Товарищтайович Ховалыгныӊ саналы-биле келир 2026 чылда «Тыва дыл – чоннуң өнчүзү» деп республика чергелиг шуулганны филология эртемнериниң доктору, профессор Шулуу Чыргал-оолович Саттың 100 чыл оюнга тураскаадып эрттирер.