Экии хүндүлүг чаңгыс чер-чурттугларым!
Эрткен неделя төнчүзүнде Мөңгүн-Тайга кожуунче ажылчын үнүүшкүн-биле чорааш келдим.
Эрткен чылын, Тыва Республикавысты Улуг Алтай тайгаларын долгандыр чурттап чоруур чоннарның аразында Сүмелекчи Чөвүлелиниң бүрүн эргелиг төлээзи кылдыр киирген.
Чөвүлел кежигүүннеринге хамааржыр Россияның Алтай край, Даг Алтай Республика, Тыва Республика, Казахстанның Чөөн-Казахстан облазы, Кыдаттың Синьзян-Уйгур автономнуг району, Моолдуң Баян-Улгий база Увс аймактары болуп турар.
Ынчангаш, эртежик планнаашкын ажыл-херек тургузары-биле Мөңгүн-Тайганың чагырга даргазы Иргит Ч.М. база оралакчылары, кожууннуң Дээди Хуралда депутады Монгуш У.Б., кожуун Хуралының даргазы, культура болгаш көдээ ажыл-агый эргелелдери биле баштайгы тургузукчу хуралды эртирдим!
Бо чайын ''Улуг Алтай - бистиң ниити бажыңывыс'' деп чөвүлелдиң эртирер экономиктиг форумунга, фестивальдарынга, хуралдарынга, спортчу болгаш культурлуг хемчеглеринге, ус-шеверлерниң мөөрейинге эки белеткенип, төлептиг киржирин дугуруштувус. Мөңгүн-Тайга кожууннуң удуртукчулары өөрүшкү биле сонуургап, эртежик белеткенип эгелээрин саавыр кырында дугуруштувус!!!
Чүгле бурунгаар Мөңгүн-Тайгажылар!!!
